Нічога дзіўнага, бо ў такую гарачую пару больш за ўсё хочацца бавіць час на беразе возера ці рэчкі. Да таго ж, плаванне - гэта яшчэ і выдатная магчымасць сумясціць прыемнае з карысным! А для таго, каб адпачынак прыносіў толькі задавальненне, не трэба забывацца на асноўныя правілы бяспекі. Безумоўна, надзвычайных сітуацый на вадзе варта пазбягаць, аднак, калі ўжо Вы ці навакольныя апынуліся ў форс-мажорных абставінах, то неабходна дакладна ведаць, як дзейнічаць.
Больш за ўсё ў летні перыяд да небяспекі схільныя дзеці. Менавіта таму, адпраўляючыся з дзецьмі на вадаём, растлумачце ім, як трэба сябе паводзіць, каб не патрапіць у бяду. Не выпускайце іх з-пад увагі – заўсёды будзьце напагатове, бо дапамога можа спатрэбіцца маляню ў любы момант. Але памятайце, што рана ці позна Ваша дзіця рушыць услед Вашаму прыкладу, а не парад, таму ў першую чаргу строга выконвайце правілы паводзін на вадзе самі!
Адна з праблем падчас плавання - гэта пачуццё меры, якое многія губляюць, забываючы, што доўгае знаходжанне ў вадзе прыводзіць да пераахаладжэння арганізма. Калі Вы адчулі дрыжыкі, трэба неадкладна выйсці на бераг і зрабіць кароткую, але энергічную прабежку. Працягласць купання залежыць ад тэмпературы паветра і вады, сілы ветра. Найбольш спрыяльныя ўмовы - яснае зацішнае надвор'е ад +25°С і вада не ніжэй за +18°С.
Не нырайце з разбегу, захадзіце ў ваду паступова, каб даць целу прывыкнуць да перападу тэмператур і пазбегнуць спазмаў крывяносных сасудаў. Калі вы шмат часу правялі на сонцы, не спяшайцеся: адыдзіце ў цень, астыньце і толькі потым ідзіце плаваць. Не варта купацца нашча ці адразу пасля ежы. Рабіць гэта лепш праз паўтары гадзіны пасля прыёму ежы. Ні ў якім разе не заходзіце ў ваду падчас навальніцы! Навучыцеся адпачываць на вадзе: лежачы на спіне або прыціснуўшы калені і локці да грудзей і жывата (паплаўком). Здзяйсняючы далёкія заплывы, эканомна расходуйце сілы, час ад часу адпачывайце. Не адплывайце далёка ад берага на надзіманых матрацах і кругах. Калі плаваеце дрэнна, трымайцеся бліжэй да берага, каб у любы момант дакрануцца да дна нагамі.
Даволі частае здарэнне - сутарга. Яна можа ўзнікнуць калі заўгодна і дзе заўгодна, таму гатовым трэба быць заўсёды. Калі Вы адчулі, што звяло нагу (часцей за ўсё ікраножную мышцу) - не панікуйце і не губляйцеся. Зрабіце глыбокі ўдых і акунiцеся пад ваду з галавой. Моцна ўхапіце рукой вялікі палец і моцна цягніце ступню на сябе, пакуль нага не выпрастаецца цалкам. Адразу ж плывіце да берага.
Яшчэ адна небяспека, якая можа ўзнікнуць на Вашым шляху - вір. У такім разе варта набраць пабольш паветра ў лёгкія, пагрузіцца ў ваду і, зрабіўшы рывок у бок плыні, усплыць на паверхню. Калі ж Вы патрапілі ў моцную плынь, не плывіце супраць яе: выкарыстоўвайце плынь, каб наблізіцца да берага. Перашкодзіць купанню могуць таксама зараснікі багавіння. Заблытацца ў іх справа, вядома, зусім непрыемная, аднак зладзіцца з раслінамі не так ужо і складана. Трымаючыся на плаву, спакойна падцягніце ногі і асцярожна вызваліцеся ад багавіння.
І, нарэшце, самае страшнае, што можа адбыцца - Вы пачалі тануць. Трымаць сябе ў руках у дадзенай сітуацыі вельмі складана, аднак неабходна. Не боўтайцеся, супакойцеся і перавярніцеся на жывот ці на спіну, раскіньце як мага шырэй рукі і ногі - так вы ўсплывеце на паверхню. Лежучы на жываце, каб зрабіць новы ўдых, падніміце галаву, а затым выдыхайце ў ваду. Лежучы на спіне, дыхайце павольна і глыбока. Не выдыхайце да канца, у лёгкіх заўсёды павінна заставацца паветра, яно будзе падтрымліваць Вас. Рукамі злёгку заграбайце ваду пад сябе, гэта таксама дапаможа заставацца на плаву. Трохі адпачыўшы, плывіце да найблізкага берага.
Сцвярджэнне, што выратаванне тапельцаў - справа рук саміх тапельцаў, дзейнічае не заўсёды! Майце на ўвазе, што ў нейкі момант выратаванне тапельцаў можа стаць справай Вашых рук, і Вы да такога павароту падзей павінны быць гатовы. Такім чынам, для пачатку паклічце на дапамогу іншых людзей або ратавальнікаў, калі такія побач маюцца. Кіньце тонучаму выратавальны круг або доўгую вяроўку з вузлом на канцы. Калі ёсць лодка, то падплывіце да чалавека на ёй і паспрабуйце дапамагчы. Калі ж Вы плаваеце добра і ўпэўнены ў сваіх сілах, паспрабуйце дабрацца да гора-плыўца самастойна. Наблізіўшыся, абхапіце яго ззаду за плечы і паспрабуйце пазбегнуць сутаргавых спроб ухапіцца за Вас, якія будзе прадпрымаць панікуючы тонучы чалавек, плывіце з ім зваротна. Калі ж тапелец без прытомнасці, цягніце яго да берага, узяўшы рукой пад падбародак такім чынам, каб яго твар увесь час знаходзілася над паверхняй вады. Папрасіце людзей, якія знаходзяцца побач, выклікаць хуткую. Неадкладна прыступайце да аказання першай дапамогі.
Параліч дыхальнага цэнтра надыходзіць праз 4-6 хвілін пасля апускання пад ваду, а сардэчная дзейнасць можа захоўвацца да 15 хвілін, таму мерапрыемствы па аказанні дапамогі павінны выконвацца хутка. Калі пацярпелы паспеў наглытацца вады ці страціў прытомнасць, неабходна адразу ж выдаліць ваду з яго лёгкіх. Для гэтага пакладзяце яго жыватом на валік (бервяно) або на калена так, каб галава звешвалася ўніз. Затым рэзка націскайце расчыненымі далонямі паміж лапатак. Паўтараць гэту працэдуру трэба да таго часу, пакуль з рота пацярпелага не пацячэ вада.
Калі ж дыхаць пацярпелы пасля гэтага не пачне, трэба пераходзіць да сардэчна-лёгачнай рэанімацыі (СЛР). Перавярніце чалавека на спіну і абкладзеце яго на цвёрдую паверхню. Ачысціце нос і рот ад бруду і глею. Прыступайце да штучнага дыхання і непрамога масажу сэрца: 1 удых - 5 націскаў (калі СЛР робіць 1 чалавек) і 2 удыхi - 10 націскаў (калі СЛР робяць 2 чалавекі). Працягвайце да таго часу, пакуль пацярпелы не зможа дыхаць самастойна.
Адпачынак у вадаёма, нажаль, не заўсёды сканчаецца ўдала, таму да любых нечаканасцяў трэба быць гатовым як фізічна, так і псіхалагічна. І тут важна навучыцца кантраляваць сябе ў непрадбачаных абставінах, не дазваляць страху авалодаць сабой. Памятайце, як толькі Вы супакоіцеся і зберацеся, выхад з сітуацыі, нават надзвычайнай, знайсці будзе значна хутчэй і прасцей!
Забараняецца:
- Заплываць за знакі агароджы і папераджальныя знакі
- Купацца і ныраць у забароненых і невядомых месцах
- Купацца ў стане алкагольнага ап'янення
- Скакаць у ваду з дамбаў, прыстаняў, катэраў, лодак, плытоў
- Дапускаць свавольствы, звязаныя з ныраннем і захопам канечнасцяў купаючыхся, узбірацца на буі і іншыя тэхнічныя збудаванні
- Падаваць ілжывыя сігналы бедства;
- Перамяшчацца ў лодцы з месца на месца пры катанні
- Выкарыстоўваць для плавання дошкі, бярвёны, надзіманыя матрацы, камеры аўтамашын і іншыя дапаможныя сродкі;
- Забруджваць і засмечваць вадаёмы.
211440, Віцебская вобл., г. Наваполацк, вул. Маладзёжная, 74
